ashk aankhon mein chhupa leta hun main

ashk āñkhoñ meñ chhupā letā huuñ maiñ

ġham chhupāne ke liye hañstā huuñ maiñ

sharm aatī thī kabhī tujh se mujhe

zindagī ab ḳhud se sharminda huuñ maiñ

muddatoñ se ā.īna dekhā nahīñ

koī batlā.e mujhe kaisā huuñ maiñ

ġham ḳhushī vahshat pareshānī sakūñ

saikḌoñ chehroñ kā ik chehra huuñ maiñ

hai mujhī meñ ham-nafas merā koī

saañs vo letā hai aur zinda huuñ maiñ

itne khaa.e haiñ sarāboñ se fareb

sāmne dariyā hai aur pyāsā huuñ maiñ

yaad aayā hai mujhe ik ham-safar

jab kabhī is raah se guzrā huuñ maiñ

chaar jānib ek sannāTā sukūt

ġhāliban bastī meñ ab tanhā huuñ maiñ

mujh ko chhūne kā na kar armāñ 'shajar'

to mujhe mahsūs kar kaisā huuñ maiñ

ashk aankhon mein chhupa leta hun main

gham chhupane ke liye hansta hun main

sharm aati thi kabhi tujh se mujhe

zindagi ab KHud se sharminda hun main

muddaton se aaina dekha nahin

koi batlae mujhe kaisa hun main

gham KHushi wahshat pareshani sakun

saikDon chehron ka ek chehra hun main

hai mujhi mein ham-nafas mera koi

sans wo leta hai aur zinda hun main

itne khae hain sarabon se fareb

samne dariya hai aur pyasa hun main

yaad aaya hai mujhe ek ham-safar

jab kabhi is rah se guzra hun main

chaar jaanib ek sannaTa sukut

ghaaliban basti mein ab tanha hun main

mujh ko chhune ka na kar arman 'shajar'

to mujhe mahsus kar kaisa hun main