ashk aaya aankh mein jalta hua

ashk aayā aañkh meñ jaltā huā

aaj soz-e-ġham kā andāza huā

zindagī guzrī ummīd-o-yās meñ

dil kabhī gulshan kabhī sahrā huā

zikr-e-zulf-e-yār rahne do abhī

mas.ala hai ziist kā uljhā huā

ban gayā dāman meñ vo aañsū guhar

jo na merī aañkh kā taarā huā

bārhā ruk ruk ga.ī nabz-e-jahāñ

husn kā jaadū hai kyā chaltā huā

gardishoñ se kyā mujhe degā najāt

jaam ḳhud gardish meñ hai aayā huā

dil vo kyā jo ġham se ho nā-āshnā

ġham vo kyā jis kā ki andāza huā

ham pareshāñ-hāl 'fāzil' se mile

hai tabī.at kā bahut suljhā huā

ashk aaya aankh mein jalta hua

aaj soz-e-gham ka andaza hua

zindagi guzri ummid-o-yas mein

dil kabhi gulshan kabhi sahra hua

zikr-e-zulf-e-yar rahne do abhi

masala hai zist ka uljha hua

ban gaya daman mein wo aansu guhar

jo na meri aankh ka tara hua

barha ruk ruk gai nabz-e-jahan

husn ka jadu hai kya chalta hua

gardishon se kya mujhe dega najat

jam KHud gardish mein hai aaya hua

dil wo kya jo gham se ho na-ashna

gham wo kya jis ka ki andaza hua

hum pareshan-haal 'fazil' se mile

hai tabiat ka bahut suljha hua