ashk-bari nahin furqat mein sharar-bari hai

ashk-bārī nahīñ furqat meñ sharar-bārī hai

aañkh meñ ḳhuun kā qatra hai ki chingārī hai

har nafas ziist guzar jaane kā ġham taarī hai

maut kā ḳhauf bhī ik ruuh kī bīmārī hai

bāvajūde-ki mohabbat koī zanjīr nahīñ

phir bhī dil ko mire ehsās-e-giraftārī hai

kuchh is andāz se us ne ġham-e-furqat baḳhshā

jaise ye bhī koī in.ām-e-vafādārī hai

ġham-e-ḳhāmosh ko be-vaj.h tasallī denā

dil-navāzī kī ye sūrat bhī dil-āzārī hai

roz hālāt badalte haiñ ba-shart-e-taufīq

ziist majmūa-e-āsānī o dushvārī hai

jāgnā 'ishq meñ har ek kī taqdīr nahīñ

niiñd qurbān ho jis par ye vo bedārī hai

kī mire haath se yuuñ nazr-e-bahār us ne qubūl

jaise ye phuul nahīñ hai koī chingārī hai

ik taġhāful se huā 'ishq kā dil ko ehsās

us kī ġhaflat kā natīja mirī hushyārī hai

yuuñ bhī ārā.ish-e-paiham meñ ulajhtā hai koī

ye ḳhud-ārā.ī hai dekho ki ḳhud-āzārī hai

mātam-e-ishq se fursat nahīñ miltī hai 'sabā'

roz-o-shab apnī umīdoñ ko azā-dārī hai

ashk-bari nahin furqat mein sharar-bari hai

aankh mein KHun ka qatra hai ki chingari hai

har nafas zist guzar jaane ka gham tari hai

maut ka KHauf bhi ek ruh ki bimari hai

bawajude-ki mohabbat koi zanjir nahin

phir bhi dil ko mere ehsas-e-giraftari hai

kuchh is andaz se us ne gham-e-furqat baKHsha

jaise ye bhi koi inam-e-wafadari hai

gham-e-KHamosh ko be-wajh tasalli dena

dil-nawazi ki ye surat bhi dil-azari hai

roz haalat badalte hain ba-shart-e-taufiq

zist majmua-e-asani o dushwari hai

jagna 'ishq mein har ek ki taqdir nahin

nind qurban ho jis par ye wo bedari hai

ki mere hath se yun nazr-e-bahaar us ne qubul

jaise ye phul nahin hai koi chingari hai

ek taghaful se hua 'ishq ka dil ko ehsas

us ki ghaflat ka natija meri hushyari hai

yun bhi aaraish-e-paiham mein ulajhta hai koi

ye KHud-arai hai dekho ki KHud-azari hai

matam-e-ishq se fursat nahin milti hai 'saba'

roz-o-shab apni umidon ko aza-dari hai