ashk baha le aahen bhar le

ashk bahā le aaheñ bhar le

dil ke bojh ko halkā kar le

maiñ ne tujh se pyaar kiyā hai

jo bhī tujhe karnā ho kar le

ab vo mujh ko bhuul gayā hai

aisī baat kā kaun asar le

ḳhush-kāmī nāyāb huī hai

nākāmī se jholī bhar le

ġham-ḳhvāroñ se ghabrātā hai

aise dil kī kaun ḳhabar le

kal tū maaTī ho jā.egā

jitnā chāhe aaj sañvar le

sab sāthī sairāb hue haiñ

ab tū bhī paimāna bhar le

tujh ko bhī ye haq hai 'sarvar'

chāhe jī le chāhe mar le

ashk baha le aahen bhar le

dil ke bojh ko halka kar le

main ne tujh se pyar kiya hai

jo bhi tujhe karna ho kar le

ab wo mujh ko bhul gaya hai

aisi baat ka kaun asar le

KHush-kaami nayab hui hai

nakaami se jholi bhar le

gham-KHwaron se ghabraata hai

aise dil ki kaun KHabar le

kal tu maTi ho jaega

jitna chahe aaj sanwar le

sab sathi sairab hue hain

ab tu bhi paimana bhar le

tujh ko bhi ye haq hai 'sarwar'

chahe ji le chahe mar le