ashk is shan se kuchh dar-e-palak par nikle

ashk is shaan se kuchh dār-e-palak par nikle

jis tarah zulm kī bastī se payambar nikle

mauja-e-dard kabhī aah meñ Dhal kar nikle

jāma-e-abr meñ jis tarah samundar nikle

ham ki shākī the shab-e-rafta ke paikāñ se magar

roz-e-raushan tire hāthoñ meñ bhī ḳhanjar nikle

maiñ jinheñ gauhar-e-nāyāb samajh baiThā thā

haath meñ le ke jo dekhā to vo patthar nikle

kis ke māthe ko kahūñ apne lahū kī taqdīr

mere qātil mire apne hī barādar nikle

un ke har va.ade pe ummīd kā ḳhuuñ hotā rahā

un ke va.ade bhī mire daur ke rahbar nikle

dhuup jin zarroñ ko detī rahī jalne kā payām

raat aa.ī to vahī sūrat-e-aḳhtar nikle

dāman-e-shab pe gire ashk jo taare ban kar

sīna-e-shāḳh se ubhre to vo aḳhgar nikle

marmarīñ jism sharāboñ kī mahak dast-e-havas

raat bhīgī to ka.ī rang ke manzar nikle

chashm-e-duniyā meñ jo miTTī ke piyāle the faqat

dast-e-sāqī meñ jo pahuñche to vo 'sāġhar' nikle

ashk is shan se kuchh dar-e-palak par nikle

jis tarah zulm ki basti se payambar nikle

mauja-e-dard kabhi aah mein Dhal kar nikle

jama-e-abr mein jis tarah samundar nikle

hum ki shaki the shab-e-rafta ke paikan se magar

roz-e-raushan tere hathon mein bhi KHanjar nikle

main jinhen gauhar-e-nayab samajh baiTha tha

hath mein le ke jo dekha to wo patthar nikle

kis ke mathe ko kahun apne lahu ki taqdir

mere qatil mere apne hi baradar nikle

un ke har wade pe ummid ka KHun hota raha

un ke wade bhi mere daur ke rahbar nikle

dhup jin zarron ko deti rahi jalne ka payam

raat aai to wahi surat-e-aKHtar nikle

daman-e-shab pe gire ashk jo tare ban kar

sina-e-shaKH se ubhre to wo aKHgar nikle

marmarin jism sharabon ki mahak dast-e-hawas

raat bhigi to kai rang ke manzar nikle

chashm-e-duniya mein jo miTTi ke piyale the faqat

dast-e-saqi mein jo pahunche to wo 'saghar' nikle