ashk ko chain se donon hi ne rahne na diya

ashk ko chain se donoñ hī ne rahne na diyā

ġham ne rukne na diyā zabt ne bahne na diyā

aah bhī ġham meñ na kī ashk bhī bahne na diyā

terī furqat ne mujhe chain se rahne na diyā

mere afsāne ke har lafz meñ ik mahshar thā

vo to achchhā huā tum ne mujhe kahne na diyā

jis taraf chāhā adāoñ se mujhe moḌ liyā

tum ne ik baat pe qaa.em mujhe rahne na diyā

ham ne Tapkā diye palkoñ se ḳhushī ke aañsū

phuul kāñToñ kī hifāzat meñ bhī rahne na diyā

sāqī-e-mast kī sirf ek jhalak hī dekhī

aañkh milte hī mujhe hosh meñ rahne na diyā

vahshat-e-dil mujhe duniyā meñ liye phirtī hai

mire mahbūb ne mujh ko kahīñ rahne na diyā

ham ne buniyād-e-mohabbat jahāñ rakkhī 'nashtar'

ham ko logoñ ne vahāñ chain se rahne na diyā

ashk ko chain se donon hi ne rahne na diya

gham ne rukne na diya zabt ne bahne na diya

aah bhi gham mein na ki ashk bhi bahne na diya

teri furqat ne mujhe chain se rahne na diya

mere afsane ke har lafz mein ek mahshar tha

wo to achchha hua tum ne mujhe kahne na diya

jis taraf chaha adaon se mujhe moD liya

tum ne ek baat pe qaem mujhe rahne na diya

hum ne Tapka diye palkon se KHushi ke aansu

phul kanTon ki hifazat mein bhi rahne na diya

saqi-e-mast ki sirf ek jhalak hi dekhi

aankh milte hi mujhe hosh mein rahne na diya

wahshat-e-dil mujhe duniya mein liye phirti hai

mere mahbub ne mujh ko kahin rahne na diya

hum ne buniyaad-e-mohabbat jahan rakkhi 'nashtar'

hum ko logon ne wahan chain se rahne na diya