ashk palkon par aTak kar rah gae

ashk palkoñ par aTak kar rah ga.e

qāfile raste meñ thak kar rah ga.e

bujh ga.e jal jal ke aashā ke diye

raat jugnū se chamak kar rah ga.e

koī un kā pūchhne vaalā na thā

phal daraḳhtoñ par jo pak kar rah ga.e

phuul kā tohfa to pahuñchā haath meñ

ḳhaar āñkhoñ meñ khaTak kar rah ga.e

thī rasā.ī jin kī vo sūraj bane

nā-rasā zarre damak kar rah ga.e

sūkhe hoñToñ tak na pahuñchā ek bhī

jaam kitne hī chhanak kar rah ga.e

raah to sīdhī 'asīr' us ghar kī hai

log jaane kyoñ bhaTak kar rah ga.e

ashk palkon par aTak kar rah gae

qafile raste mein thak kar rah gae

bujh gae jal jal ke aasha ke diye

raat jugnu se chamak kar rah gae

koi un ka puchhne wala na tha

phal daraKHton par jo pak kar rah gae

phul ka tohfa to pahuncha hath mein

KHar aankhon mein khaTak kar rah gae

thi rasai jin ki wo suraj bane

na-rasa zarre damak kar rah gae

sukhe honTon tak na pahuncha ek bhi

jam kitne hi chhanak kar rah gae

rah to sidhi 'asir' us ghar ki hai

log jaane kyon bhaTak kar rah gae