ashk par gudaz-dil hashiya chaDhata hai

ashk par gudāz-dil hāshiya chaḌhātā hai

ik zarā se qisse ko dāstāñ banātā hai

haañ vo kāfir-e-nemat kor-zauq hai yaaro

jo ġham-e-mohabbat ko hādisa batātā hai

jīte-jī kā rishta hai rūh-o-jism kā rishta

dhuup ke ta.āqub meñ saaya maat khātā hai

jab zabān-bandī ho nazreñ kaam kartī haiñ

ik payām aatā hai ik payām jaatā hai

pattharoñ ke siine meñ aa.ine bhī hiire bhī

zulmatoñ kā ḳhāliq hī mehr-o-mah ugātā hai

kyuuñ javār-e-manzil meñ sust-e-gām haiñ raahī

qurb kā yaqīñ shāyad fāsla baḌhātā hai

ai 'urūj' ye duniyā qadr-e-dard kyā jaane

kyuuñ zamāna-sāzoñ ko hāl-e-dil sunātā hai

ashk par gudaz-dil hashiya chaDhata hai

ek zara se qisse ko dastan banata hai

han wo kafir-e-nemat kor-zauq hai yaro

jo gham-e-mohabbat ko hadisa batata hai

jite-ji ka rishta hai ruh-o-jism ka rishta

dhup ke taaqub mein saya mat khata hai

jab zaban-bandi ho nazren kaam karti hain

ek payam aata hai ek payam jata hai

pattharon ke sine mein aaine bhi hire bhi

zulmaton ka KHaliq hi mehr-o-mah ugata hai

kyun jawar-e-manzil mein sust-e-gam hain rahi

qurb ka yaqin shayad fasla baDhata hai

ai 'uruj' ye duniya qadr-e-dard kya jaane

kyun zamana-sazon ko haal-e-dil sunata hai