ashk se dariya hua dariya se tufan ho gaya

ashk se dariyā huā dariyā se tūfāñ ho gayā

kashtī-e-‘umr-e-ravāñ kā sāz-o-sāmāñ ho gayā

fasl-e-gul meñ dil kī vahshat kā jo sāmāñ ho gayā

chaak dāman ho gayā purze garebāñ ho gayā

daf'atan us ne ruḳh-e-raushan se jab ulTī naqāb

ek merī baat kyā 'ālam bhī hairāñ ho gayā

yuuñ bazāhir barq kī puurī huī ḳhvāhish magar

āshiyāna jal ke ḳhud gulshan pe qurbāñ ho gayā

ab rihā.ī kī koī sūrat nazar aatī nahīñ

murġh-e-dil merā asīr-e-zulf-e-pechāñ ho gayā

ranj-o-ġham dard-o-alam 'sāqī' ne apne de diye

merī ḳhātir ḳhuub āsā.ish kā sāmāñ ho gayā

ashk se dariya hua dariya se tufan ho gaya

kashti-e-‘umr-e-rawan ka saz-o-saman ho gaya

fasl-e-gul mein dil ki wahshat ka jo saman ho gaya

chaak daman ho gaya purze gareban ho gaya

daf'atan us ne ruKH-e-raushan se jab ulTi naqab

ek meri baat kya 'alam bhi hairan ho gaya

yun bazahir barq ki puri hui KHwahish magar

aashiyana jal ke KHud gulshan pe qurban ho gaya

ab rihai ki koi surat nazar aati nahin

murgh-e-dil mera asir-e-zulf-e-pechan ho gaya

ranj-o-gham dard-o-alam 'saqi' ne apne de diye

meri KHatir KHub aasaish ka saman ho gaya