ashk Tapka na meri aankh mein KHun aaya hai

ashk Tapkā na mirī aañkh meñ ḳhuuñ aayā hai

muddatoñ baa'd kahīñ dil ko sukūñ aayā hai

is liye hai mire ash'ār meñ ġham kī shiddat

mere hisse meñ tirā dard-e-fuzūñ aayā hai

ret par paḌne lagīñ ḳhuuñ kī phuvāreñ yak-dam

koī is tarh sar-e-dasht-e-junūñ aayā hai

gar tire yaar tujhe zahr nahīñ de sakte

kyoñ jigar kaT ke tirā muñh se barūñ aayā hai

fā.eda kuchh bhī nahīñ hogā rafū karne se

zaḳhm is baar mujhe itnā darūñ aayā hai

vo parī dekh ke mā'lūm huā hai mujh ko

kaun is shahr pe karne ko fusūñ aayā hai

maiñ mohabbat meñ kabhī shirk nahīñ kar saktā

tū mukammal mire me'yār pe yuuñ aayā hai

ham se mahrūmoñ ko itnā to batāyā jaa.e

ai ḳhudā kis ke liye kun-fayakūñ aayā hai

ashk Tapka na meri aankh mein KHun aaya hai

muddaton ba'd kahin dil ko sukun aaya hai

is liye hai mere ash'ar mein gham ki shiddat

mere hisse mein tera dard-e-fuzun aaya hai

ret par paDne lagin KHun ki phuwaren yak-dam

koi is tarh sar-e-dasht-e-junun aaya hai

gar tere yar tujhe zahr nahin de sakte

kyon jigar kaT ke tera munh se barun aaya hai

faeda kuchh bhi nahin hoga rafu karne se

zaKHm is bar mujhe itna darun aaya hai

wo pari dekh ke ma'lum hua hai mujh ko

kaun is shahr pe karne ko fusun aaya hai

main mohabbat mein kabhi shirk nahin kar sakta

tu mukammal mere me'yar pe yun aaya hai

hum se mahrumon ko itna to bataya jae

ai KHuda kis ke liye kun-fayakun aaya hai