ashkon ki ghanghor ghaTa hai

ashkoñ kī ghanghor ghaTā hai

nain samundar kaañp rahā hai

ghor añdherā hai to kyā hai

raat kā sūraj chamak rahā hai

kashtī koī Duub na jaa.e

shoḳh samundar umaD rahā hai

zulm kī duniyā zard-ālūda

sabr kī duniyā sabz-numā hai

jañgal-jañgal raushan-raushan

apnā dil kyoñ bujhā bujhā hai

dil kā chehra raushan-raushan

lagtā hai mahtāb huā hai

dāġh-e-furqat aur farozāñ

jab bhī charāġh-e-yād jalā hai

karb kī ḳhushbū aur baḌhegī

dil meñ ab ye phuul khilā hai

duniyā ke ġham bhuul gayā huuñ

terā tasavvur hosh-rubā hai

'aḳhtar' jī kī suḳhanvarī meñ

rañg-e-taġhazzul bol rahā hai

ashkon ki ghanghor ghaTa hai

nain samundar kanp raha hai

ghor andhera hai to kya hai

raat ka suraj chamak raha hai

kashti koi Dub na jae

shoKH samundar umaD raha hai

zulm ki duniya zard-aluda

sabr ki duniya sabz-numa hai

jangal-jangal raushan-raushan

apna dil kyon bujha bujha hai

dil ka chehra raushan-raushan

lagta hai mahtab hua hai

dagh-e-furqat aur farozan

jab bhi charagh-e-yaad jala hai

karb ki KHushbu aur baDhegi

dil mein ab ye phul khila hai

duniya ke gham bhul gaya hun

tera tasawwur hosh-ruba hai

'aKHtar' ji ki suKHanwari mein

rang-e-taghazzul bol raha hai