ashkon ko apni aankh mein paiham liye hue

ashkoñ ko apnī aañkh meñ paiham liye hue

ham chal rahe haiñ jaise sharābī piye hue

kyā jaane kyā huā hai ki dīvāna ro paḌā

lailā ga.ī hai dasht se parda kiye hue

ab ke shab-e-firāq kā aalam na pochhiye

māyūs ab sahar se hamāre diye hue

ye irtiqā hai un kā ki pastī kī ibtidā

bainassutūr the jo vo ab hāshiye hue

ilzām ham pe rakh ke vo uTThe chale ga.e

baiThe rahe ham apne laboñ ko siye hue

ab intizār-e-nāma-barāñ ḳhatm ho chukā

nā-paid apne shahr se ab Dākiye hue

achchhī zamīñ meñ sher bhī achchhe hue magar

'dānish' kamāl tang tire qāfiye hue

ashkon ko apni aankh mein paiham liye hue

hum chal rahe hain jaise sharabi piye hue

kya jaane kya hua hai ki diwana ro paDa

laila gai hai dasht se parda kiye hue

ab ke shab-e-firaq ka aalam na pochhiye

mayus ab sahar se hamare diye hue

ye irtiqa hai un ka ki pasti ki ibtida

bainassutur the jo wo ab hashiye hue

ilzam hum pe rakh ke wo uTThe chale gae

baiThe rahe hum apne labon ko siye hue

ab intizar-e-nama-baran KHatm ho chuka

na-paid apne shahr se ab Dakiye hue

achchhi zamin mein sher bhi achchhe hue magar

'danish' kamal tang tere qafiye hue