ashkon ne yun shor machaya aankhon ke paimanon mein

ashkoñ ne yuuñ shor machāyā āñkhoñ ke paimānoñ meñ

jaise bauchhāreñ barsīñ hoñ Tiin paḌe dālānoñ meñ

sūraj kā sab zo'm takabbur lamhoñ meñ bhar lete haiñ

bādal ke kuchh ziddī TukḌe apne ThanDe shānoñ meñ

ummīdoñ ke diip jalā.e āñkhoñ meñ chhoTī chhoTī

hañste haiñ kuchh bhūke bachche ġhurbat ke zindānoñ meñ

nafrat dhokā buġhz ta.assub jhuuT dikhāvā ḳhud-ġharazī

kaise kaise zahr bhare haiñ insāñ kī shiryānoñ meñ

bachpan kī ik dost qarībī jis jhagḌe meñ rūThī thī

aaj bhī hai vo TuuTī guḌiyā yādoñ ke sāmānoñ meñ

lailā majnūñ ke qisse ab sandūqoñ meñ band hue

ishq mohabbat vaalī ġhazleñ bosīda dīvānoñ meñ

jangal vaale ḳhūn-ḳharābe jhūTī bāteñ lagtī haiñ

insānoñ kī bastī kī hai dhuum machī haivānoñ meñ

ashkon ne yun shor machaya aankhon ke paimanon mein

jaise bauchhaaren barsin hon Tin paDe dalanon mein

suraj ka sab zo'm takabbur lamhon mein bhar lete hain

baadal ke kuchh ziddi TukDe apne ThanDe shanon mein

ummidon ke dip jalae aankhon mein chhoTi chhoTi

hanste hain kuchh bhuke bachche ghurbat ke zindanon mein

nafrat dhoka bughz tassub jhuT dikhawa KHud-gharazi

kaise kaise zahr bhare hain insan ki shiryanon mein

bachpan ki ek dost qaribi jis jhagDe mein ruThi thi

aaj bhi hai wo TuTi guDiya yaadon ke samanon mein

laila majnun ke qisse ab sanduqon mein band hue

ishq mohabbat wali ghazlen bosida diwanon mein

jangal wale KHun-KHarabe jhuTi baaten lagti hain

insanon ki basti ki hai dhum machi haiwanon mein