ashkon pe iKHtiyar in aankhon ne kho diya

ashkoñ pe iḳhtiyār in āñkhoñ ne kho diyā

ik mauj-e-yād-e-yār ne mujh ko Dubo diyā

palkoñ pe jab bhī ḳhvāb kī koī kalī khilī

anjām-e-gul ne ḳhauf kā nashtar chubho diyā

is zindagī se ham ne taqāze nahīñ kiye

chup-chāp rakh liyā hai sadā us ne jo diyā

phir yuuñ huā ki zabt kī had TūTne lagī

hañsnā muhāl hone lagā jab maiñ ro diyā

ai shaḳhs tujh se tark-e-ta'alluq kā ġham nahīñ

ġham ye hai maiñ ne ḳhud ko tire saath kho diyā

kahte the log rāh-e-mohabbat meñ phuul haiñ

kāñToñ ko kis ne phir mirī rāhoñ meñ bo diyā

ashkon pe iKHtiyar in aankhon ne kho diya

ek mauj-e-yaad-e-yar ne mujh ko Dubo diya

palkon pe jab bhi KHwab ki koi kali khili

anjam-e-gul ne KHauf ka nashtar chubho diya

is zindagi se hum ne taqaze nahin kiye

chup-chap rakh liya hai sada us ne jo diya

phir yun hua ki zabt ki had TuTne lagi

hansna muhaal hone laga jab main ro diya

ai shaKHs tujh se tark-e-ta'alluq ka gham nahin

gham ye hai main ne KHud ko tere sath kho diya

kahte the log rah-e-mohabbat mein phul hain

kanTon ko kis ne phir meri rahon mein bo diya