ashkon se tapish sine ki hoti hai ayan aur

ashkoñ se tapish siine kī hotī hai ayaañ aur

jab aag bujhātā huuñ to hotā hai dhuāñ aur

haiñ ek hī gulshan meñ magar farq to dekho

phūloñ kā jahāñ aur hai kāñToñ kā jahāñ aur

shāyad ye karishma hai mire naqsh-e-vafā kā

vo jitnā miTāte haiñ ubhartā hai nishāñ aur

sar apnā uThā luuñ jo dar-e-yār se nāseh

sajda ye mohabbat kā adā hogā kahāñ aur

ab faiz-e-bahārāñ kī karūñ ḳhaak tamanna

maiñ fasl-e-bahārāñ meñ huuñ pāmāl-e-ḳhizāñ aur

kuchh aur bikhar jaa.eñ jo ruḳh par tirī zulfeñ

chhā jaa.e ujāle pe añdhere kā samāñ aur

dāġh-e-jigar-o-dil hī nahīñ diid ke qābil

raushan sar-e-mizhgāñ hai sitāroñ kā jahāñ aur

ik arz-e-tamannā pe huā shor-e-qayāmat

kyā hogā 'azīz' aap ne kholī jo zabāñ aur

ashkon se tapish sine ki hoti hai ayan aur

jab aag bujhata hun to hota hai dhuan aur

hain ek hi gulshan mein magar farq to dekho

phulon ka jahan aur hai kanTon ka jahan aur

shayad ye karishma hai mere naqsh-e-wafa ka

wo jitna miTate hain ubharta hai nishan aur

sar apna uTha lun jo dar-e-yar se naseh

sajda ye mohabbat ka ada hoga kahan aur

ab faiz-e-bahaaran ki karun KHak tamanna

main fasl-e-bahaaran mein hun pamal-e-KHizan aur

kuchh aur bikhar jaen jo ruKH par teri zulfen

chha jae ujale pe andhere ka saman aur

dagh-e-jigar-o-dil hi nahin did ke qabil

raushan sar-e-mizhgan hai sitaron ka jahan aur

ek arz-e-tamanna pe hua shor-e-qayamat

kya hoga 'aziz' aap ne kholi jo zaban aur