ashkon se wo aasman bhara tha

ashkoñ se vo āsmāñ bharā thā

dil dard se jhilmilā gayā thā

vo zaḳhm bahāl thā badan par

paivand libās meñ lagā thā

us chāñd kī raushnī judā thī

us raat kā rang bhī nayā thā

ḳhāmosh thiiñ sarsarāhaTeñ bhī

ik lams ne shor jab kiyā thā

koñpal pe dhanak chamak rahī thī

us sharm ko rang chūmtā thā

shīshe kī rageñ chaTaḳh rahī thiiñ

sāñsoñ se ġhubār chhā rahā thā

gul-dān meñ khil rahī thī hairat

kamre meñ sukūt chhā gayā thā

hairat se bikhar rahī thī ḳhushbū

ḳhushbū kā hijāb utar chukā thā

ik lau pe utar rahī thī shabnam

ik phuul charāġh meñ jalā thā

sāñseñ ho rahī thiiñ be-tavāzun

sho'loñ pe dhamāl ho rahā thā

nazdīk kahāñ thā is qadar vo

ḳhvāboñ pe muhīt fāsla thā

maiñ ḳhvāb samajh rahā thā jis ko

dar-asl junūñ kā irtiqā thā

ashkon se wo aasman bhara tha

dil dard se jhilmila gaya tha

wo zaKHm bahaal tha badan par

paiwand libas mein laga tha

us chand ki raushni juda thi

us raat ka rang bhi naya tha

KHamosh thin sarsarahaTen bhi

ek lams ne shor jab kiya tha

konpal pe dhanak chamak rahi thi

us sharm ko rang chumta tha

shishe ki ragen chaTaKH rahi thin

sanson se ghubar chha raha tha

gul-dan mein khil rahi thi hairat

kamre mein sukut chha gaya tha

hairat se bikhar rahi thi KHushbu

KHushbu ka hijab utar chuka tha

ek lau pe utar rahi thi shabnam

ek phul charagh mein jala tha

sansen ho rahi thin be-tawazun

sho'lon pe dhamal ho raha tha

nazdik kahan tha is qadar wo

KHwabon pe muhit fasla tha

main KHwab samajh raha tha jis ko

dar-asl junun ka irtiqa tha