asir-e-bazm hun KHalwat ki justuju mein hun

asīr-e-bazm huuñ ḳhalvat kī justujū meñ huuñ

maiñ apne aap se milne kī aarzū meñ huuñ

mirī sarisht meñ rañg-e-bahār hai lekin

bahut dinoñ se kisī bāġh-e-be-numū meñ huuñ

to mujh ko bhuul gayā hai magar mire mutrib

maiñ dard ban ke tire naġhma-e-gulū meñ huuñ

ḳhizāñ-rasīda kisī naḳhl-e-nīm-jāñ ke tale

mujhe bhī dekh usī shām-e-zard-rū meñ huuñ

bhaTaktā rahtā huuñ shām-o-sahar nahīñ ma.alūm

maiñ kisī talāsh meñ huuñ kis kī justujū meñ huuñ

vo jis ke tarz-e-masīhā.ī par hai shahr nisār

usī kī teġh se Duubā huā lahū meñ huuñ

maiñ ek ātish-e-ḳhvāb-āfrīda kī sūrat

kabhī charāġh kī lau meñ kabhī subū meñ huuñ

tū mere lafzoñ se bāhar mujhe talāsh na kar

chhupā huā maiñ kahīñ apnī guftugū meñ huuñ

pukārtā huuñ madad ko koī nahīñ aatā

sitam kī shaam hai aur narġha-e-adū meñ huuñ

asir-e-bazm hun KHalwat ki justuju mein hun

main apne aap se milne ki aarzu mein hun

meri sarisht mein rang-e-bahaar hai lekin

bahut dinon se kisi bagh-e-be-numu mein hun

to mujh ko bhul gaya hai magar mere mutrib

main dard ban ke tere naghma-e-gulu mein hun

KHizan-rasida kisi naKHl-e-nim-jaan ke tale

mujhe bhi dekh usi sham-e-zard-ru mein hun

bhaTakta rahta hun sham-o-sahar nahin malum

main kisi talash mein hun kis ki justuju mein hun

wo jis ke tarz-e-masihai par hai shahr nisar

usi ki tegh se Duba hua lahu mein hun

main ek aatish-e-KHwab-afrida ki surat

kabhi charagh ki lau mein kabhi subu mein hun

tu mere lafzon se bahar mujhe talash na kar

chhupa hua main kahin apni guftugu mein hun

pukarta hun madad ko koi nahin aata

sitam ki sham hai aur nargha-e-adu mein hun