asir-e-hijr ki aab-o-hawa badalne ko

asīr-e-hijr kī āb-o-havā badalne ko

kabhī ḳhushī bhī mile zā.iqa badalne ko

mirā hijāb sulagtā hai jis kī hiddat se

tum us nazar se kaho zāviya badalne ko

maiñ tere shahr se niklī to muḌ nahīñ dekhā

agarche log mile bār-hā badalne ko

maiñ jis ke naqsh-e-qadam chūmne ko niklī thī

usī ne mujh se kahā rāsta badalne ko

hazār zaḳhm sahe aur phir yahī sochā

chalo ik aur sahī tajraba badalne ko

gar us kā saath mile to sitāre mil jaa.eñ

vo nā-guzīr huā zā.icha badalne ko

mile haiñ ham kabhī phir se judā na hone ko

chalo ye farz kareñ faisla badalne ko

yahāñ pe ḳhud ko badalnā hai gar badalnā hai

so tum se kis ne kahā hai ḳhudā badalne ko

vo ḳhud to kho chukā duniyā kī bhiiḌ meñ 'īmāñ'

mujhe bhī kah gayā apnā patā badalne ko

asir-e-hijr ki aab-o-hawa badalne ko

kabhi KHushi bhi mile zaiqa badalne ko

mera hijab sulagta hai jis ki hiddat se

tum us nazar se kaho zawiya badalne ko

main tere shahr se nikli to muD nahin dekha

agarche log mile bar-ha badalne ko

main jis ke naqsh-e-qadam chumne ko nikli thi

usi ne mujh se kaha rasta badalne ko

hazar zaKHm sahe aur phir yahi socha

chalo ek aur sahi tajraba badalne ko

gar us ka sath mile to sitare mil jaen

wo na-guzir hua zaicha badalne ko

mile hain hum kabhi phir se juda na hone ko

chalo ye farz karen faisla badalne ko

yahan pe KHud ko badalna hai gar badalna hai

so tum se kis ne kaha hai KHuda badalne ko

wo KHud to kho chuka duniya ki bhiD mein 'iman'

mujhe bhi kah gaya apna pata badalne ko