اسیران چمن کی چاک دامانی نہیں جاتی

اسیران چمن کی چاک دامانی نہیں جاتی

کلی جب پھول بن جاتی ہے پہچانی نہیں جاتی

تری محفل سے پہلے بھی پریشانی مقدر تھی

تری محفل میں آ کر بھی پریشانی نہیں جاتی

اٹھا لو جام بڑھ کر جرأت رندانہ کہتی ہے

یہاں رندان کم آمیز کی مانی نہیں جاتی

جلایا اس طرح برق حوادث نے گلستاں کو

کہ شاخ آشیاں بھی ہم سے پہچانی نہیں جاتی

نگاہ شوق تھی جو آئنہ اسرار عالم کا

مثال چشم نرگس اس کی حیرانی نہیں جاتی

نہ جانے زندگی نے کتنے میخانے لنڈھا ڈالے

مگر اہل طلب کی تشنہ سامانی نہیں جاتی

وہ برباد تمنا ہوں وہ برگشتہ مقدر ہوں

بہاروں میں بھی جس کی خانہ ویرانی نہیں جاتی

گریباں چاک ہے دامن دریدہ ہے جگر خوں ہے

عروس گل کی لیکن خندہ سامانی نہیں جاتی