asiran-e-chaman ki chaak-damani nahin jati

asīrān-e-chaman kī chāk-dāmānī nahīñ jaatī

kalī jab phuul ban jaatī hai pahchānī nahīñ jaatī

tirī mahfil se pahle bhī pareshānī muqaddar thī

tirī mahfil meñ aa kar bhī pareshānī nahīñ jaatī

uThā lo jaam baḌh kar jur.at-e-rindāna kahtī hai

yahāñ rindān-e-kam-āmez kī maanī nahīñ jaatī

jalāyā is tarah barq-e-havādis ne gulistāñ ko

ki shāḳh-e-āshiyāñ bhī ham se pahchānī nahīñ jaatī

nigāh-e-shauq thī jo aa.ina asrār-e-'ālam kā

misāl-e-chashm-e-nargis us kī hairānī nahīñ jaatī

na jaane zindagī ne kitne maiḳhāne luñDhā Daale

magar ahl-e-talab kī tishna-sāmānī nahīñ jaatī

vo barbād-e-tamannā huuñ vo bargashta muqaddar huuñ

bahāroñ meñ bhī jis kī ḳhāna-vīrānī nahīñ jaatī

garebāñ chaak hai dāman darīda hai jigar ḳhuuñ hai

‘urūs-e-gul kī lekin ḳhanda-sāmānī nahīñ jaatī

asiran-e-chaman ki chaak-damani nahin jati

kali jab phul ban jati hai pahchani nahin jati

teri mahfil se pahle bhi pareshani muqaddar thi

teri mahfil mein aa kar bhi pareshani nahin jati

uTha lo jam baDh kar jurat-e-rindana kahti hai

yahan rindan-e-kam-amez ki mani nahin jati

jalaya is tarah barq-e-hawadis ne gulistan ko

ki shaKH-e-ashiyan bhi hum se pahchani nahin jati

nigah-e-shauq thi jo aaina asrar-e-'alam ka

misal-e-chashm-e-nargis us ki hairani nahin jati

na jaane zindagi ne kitne maiKHane lunDha Dale

magar ahl-e-talab ki tishna-samani nahin jati

wo barbaad-e-tamanna hun wo bargashta muqaddar hun

bahaaron mein bhi jis ki KHana-virani nahin jati

gareban chaak hai daman darida hai jigar KHun hai

‘urus-e-gul ki lekin KHanda-samani nahin jati