asr-e-ashur se is arsa-e-shab tak ab tak

asr-e-āshūr se is arsa-e-shab tak ab tak

istiġhāse kī sadā aatī hai sab tak ab tak

dar se duurī kā sabab kuchh bhī ho par shahr ke biich

log pahuñche hī nahīñ rahmat-e-rab tak ab tak

ahl-e-īmāñ pe huī jin kī mohabbat vājib

ham nahīñ siikh sake un kā adab tak ab tak

chaudah sau saal meñ da.avā to bahut-soñ ne kiyā

koī pahuñchā nahīñ ik mard-e-ajab tak ab tak

ham ne un ko bhī sanad ibn-e-sanad maan liyā

jin kā ma.alūm nahīñ nām-o-nasab tak ab tak

koī labbaik kahe yā na kahe par 'ahmad'

istiġhāse kī sadā aatī hai sab tak ab tak

asr-e-ashur se is arsa-e-shab tak ab tak

istighase ki sada aati hai sab tak ab tak

dar se duri ka sabab kuchh bhi ho par shahr ke bich

log pahunche hi nahin rahmat-e-rab tak ab tak

ahl-e-iman pe hui jin ki mohabbat wajib

hum nahin sikh sake un ka adab tak ab tak

chaudah sau sal mein dawa to bahut-son ne kiya

koi pahuncha nahin ek mard-e-ajab tak ab tak

hum ne un ko bhi sanad ibn-e-sanad man liya

jin ka malum nahin nam-o-nasab tak ab tak

koi labbaik kahe ya na kahe par 'ahmad'

istighase ki sada aati hai sab tak ab tak