asrar-e-KHafi aur jali khol rahe the

asrār-e-ḳhafī aur jalī khol rahe the

jab gumbad-e-āfāq meñ ham bol rahe the

ḳhāmosh the jab sāhab-e-guftār jahāñ ke

us vaqt bhī ham log hī sach bol rahe the

sahrā-e-mohabbat meñ na Thahre kahīñ ik pal

har shaḳhs ke is rah meñ qadam Dol rahe the

vo aaj naqībān-e-mohabbat haiñ magar kal

pur-amn shab-o-roz meñ bis ghol rahe the

yā merī hī bātoñ meñ tavāzun na rahā thā

yā un kī kahānī meñ hī kuchh jhol rahe the

kuchh fikr hī kab mā.il-e-pur-zor thī apnī

lafzoñ ke parinde bhī to par tol rahe the

asrar-e-KHafi aur jali khol rahe the

jab gumbad-e-afaq mein hum bol rahe the

KHamosh the jab sahab-e-guftar jahan ke

us waqt bhi hum log hi sach bol rahe the

sahra-e-mohabbat mein na Thahre kahin ek pal

har shaKHs ke is rah mein qadam Dol rahe the

wo aaj naqiban-e-mohabbat hain magar kal

pur-amn shab-o-roz mein bis ghol rahe the

ya meri hi baaton mein tawazun na raha tha

ya un ki kahani mein hi kuchh jhol rahe the

kuchh fikr hi kab mail-e-pur-zor thi apni

lafzon ke parinde bhi to par tol rahe the