ataq-e-shab mein sahar ke charagh raushan kar

atāq-e-shab meñ sahar ke charāġh raushan kar

qabā-e-dil hī nahīñ dil ke daaġh raushan kar

kisī tarīq se taaza havā giraft meñ lā

kisī sabīl se apnā dimāġh raushan kar

mashām-e-jāñ meñ basā ḳhair-o-amn kī ḳhushbū

phir is mahak se mohabbat ke baaġh raushan kar

chhiḌak ke ḳhuun rag-e-dil haqīr zarroñ par

savād-e-manzil-e-jāñ ke surāġh raushan kar

salīb uThā ke kabhī kūcha-e-sitam meñ bhī chal

junūñ kī lau se bhī dasht-e-charāġh raushan kar

rah-e-hayāt meñ vahm-o-gumāñ ke saa.e haiñ

nazar meñ azm-o-yaqīñ ke ayāġh raushan kar

kabhī taqaddus-e-insān ke tū giit bhī gā

kabhī to dil meñ mohabbat kī aag raushan kar

ataq-e-shab mein sahar ke charagh raushan kar

qaba-e-dil hi nahin dil ke dagh raushan kar

kisi tariq se taza hawa giraft mein la

kisi sabil se apna dimagh raushan kar

masham-e-jaan mein basa KHair-o-amn ki KHushbu

phir is mahak se mohabbat ke bagh raushan kar

chhiDak ke KHun rag-e-dil haqir zarron par

sawad-e-manzil-e-jaan ke suragh raushan kar

salib uTha ke kabhi kucha-e-sitam mein bhi chal

junun ki lau se bhi dasht-e-charagh raushan kar

rah-e-hayat mein wahm-o-guman ke sae hain

nazar mein azm-o-yaqin ke ayagh raushan kar

kabhi taqaddus-e-insan ke tu git bhi ga

kabhi to dil mein mohabbat ki aag raushan kar