aur bhi aaenge kuchh ahl-e-wafa mere baad

aur bhī ā.eñge kuchh ahl-e-vafā mere ba.ad

aur bhī nikhregī duniyā kī fazā mere ba.ad

e'tirāf apnī ḳhatāoñ kā maiñ kartā hī chalūñ

jaane kis kis ko mile merī sazā mere ba.ad

zindagī saath hai aur dār-o-rasan par hai nazar

ḳhud badal jā.egā mafhūm-e-qazā mere ba.ad

ġhā.ebāna bhī ta.āruf mirā kyā kyā na huā

haa.e vo shaḳhs ki jo mujh se milā mere ba.ad

zaḳhm-e-dil haiñ mire phūloñ kī guzar-gāhoñ meñ

narm-rau rahnā zarā bād-e-sabā mere ba.ad

kal tirī bazm kā har ek tarahdār-e-vafā

lazzat-e-rashk se mahrūm huā mere ba.ad

kaash us se bhī ta.āruf mirā hotā 'nūrī'

jis pe vo pahle-pahal hoñge ḳhafā mere ba.ad

aur bhi aaenge kuchh ahl-e-wafa mere baad

aur bhi nikhregi duniya ki faza mere baad

e'tiraf apni KHataon ka main karta hi chalun

jaane kis kis ko mile meri saza mere baad

zindagi sath hai aur dar-o-rasan par hai nazar

KHud badal jaega mafhum-e-qaza mere baad

ghaebana bhi taaruf mera kya kya na hua

hae wo shaKHs ki jo mujh se mila mere baad

zaKHm-e-dil hain mere phulon ki guzar-gahon mein

narm-rau rahna zara baad-e-saba mere baad

kal teri bazm ka har ek tarahdar-e-wafa

lazzat-e-rashk se mahrum hua mere baad

kash us se bhi taaruf mera hota 'nuri'

jis pe wo pahle-pahal honge KHafa mere baad