aur hi chiz the kabe mein chale aane se

aur hī chiiz the ka.abe meñ chale aane se

but vo patthar haiñ ki hilte nahīñ but-ḳhāne se

khīñch ke aa.ī hai angūr ke jo daane se

hoñTh tak mere chalī aa.egī paimāne se

tū jo ma.azūr hai ai shaiḳh-e-haram aane se

girte paḌte hamīñ aa jā.eñge maiḳhāne se

der saaqī na ho muñh dekh ke rah jā.ūñgā

mai bahut tez hai uḌ jā.egī paimāne se

bekasī dekh koī ghar na milegā aisā

qadam aage na baḌhānā mire vīrāne se

sub.h ko pyaar se bichhḌe hue shab bhar ke mile

aa.ina ruḳh se milā zulf milī shāne se

zālim uThnā na mirī mahfil-e-mātam se abhī

uTh khaḌī hogī qayāmat tire uTh jaane se

jis meñ tafsīl se thā is dil-e-betāb kā zikr

vahī TukḌā unheñ bhāyā mire afsāne se

tum ne tanhā.ī meñ kis dil ke kiye the TukḌe

bū-e-ḳhūn aatī hai ab tak kisī vīrāne se

chhup gayā chāñd bujhī sham.a miTe naqsh-o-nigār

ab vo mahfil na rahī aap ke uTh jaane se

luuT lī kis ne tumhāre gul-e-āriz kī bahār

phuul murjhā ga.e ik raat ke bas jaane se

ek sāġhar ke liye aañkh dikhātā hai hameñ

le uThe jaate haiñ saaqī tire maiḳhāne se

nashsha 'safdar' ko bhī kuchh hai mai-e-mīnā.ī kā

faiz pahuñchā hai ise bhī usī maiḳhāne se

aur hi chiz the kabe mein chale aane se

but wo patthar hain ki hilte nahin but-KHane se

khinch ke aai hai angur ke jo dane se

honTh tak mere chali aaegi paimane se

tu jo mazur hai ai shaiKH-e-haram aane se

girte paDte hamin aa jaenge maiKHane se

der saqi na ho munh dekh ke rah jaunga

mai bahut tez hai uD jaegi paimane se

bekasi dekh koi ghar na milega aisa

qadam aage na baDhana mere virane se

subh ko pyar se bichhDe hue shab bhar ke mile

aaina ruKH se mila zulf mili shane se

zalim uThna na meri mahfil-e-matam se abhi

uTh khaDi hogi qayamat tere uTh jaane se

jis mein tafsil se tha is dil-e-betab ka zikr

wahi TukDa unhen bhaya mere afsane se

tum ne tanhai mein kis dil ke kiye the TukDe

bu-e-KHun aati hai ab tak kisi virane se

chhup gaya chand bujhi shama miTe naqsh-o-nigar

ab wo mahfil na rahi aap ke uTh jaane se

luT li kis ne tumhaare gul-e-ariz ki bahaar

phul murjha gae ek raat ke bas jaane se

ek saghar ke liye aankh dikhata hai hamein

le uThe jate hain saqi tere maiKHane se

nashsha 'safdar' ko bhi kuchh hai mai-e-minai ka

faiz pahuncha hai ise bhi usi maiKHane se