aur kab tak KHun-fishan mausam ka tewar dekhna

aur kab tak ḳhūñ-fishāñ mausam kā tevar dekhnā

aag barsātī nazar hāthoñ meñ ḳhanjar dekhnā

chhīn kar āñkhoñ se bīnā.ī na le jaa.e kahīñ

har taraf jaltī huī lāshoñ kā manzar dekhnā

aag jab phailī to hamsā.e kā ghar bhī jal gayā

us ne chāhā thā mirā jaltā huā ghar dekhnā

ab kaf-e-afsos kyā maltā hai ham kahte na the

paañv phailāne se pahle apnī chādar dekhnā

ab to kankar bhī guhar ke daam meñ bikne lage

kauḌiyoñ ke mol ab la.al-o-javāhar dekhnā

māh-o-anjum ho chuke tasḳhīr 'farhat' ab zarā

zaat ke andhe kueñ meñ bhī utar kar dekhnā

aur kab tak KHun-fishan mausam ka tewar dekhna

aag barsati nazar hathon mein KHanjar dekhna

chhin kar aankhon se binai na le jae kahin

har taraf jalti hui lashon ka manzar dekhna

aag jab phaili to hamsae ka ghar bhi jal gaya

us ne chaha tha mera jalta hua ghar dekhna

ab kaf-e-afsos kya malta hai hum kahte na the

panw phailane se pahle apni chadar dekhna

ab to kankar bhi guhar ke dam mein bikne lage

kauDiyon ke mol ab lal-o-jawahar dekhna

mah-o-anjum ho chuke tasKHir 'farhat' ab zara

zat ke andhe kuen mein bhi utar kar dekhna