aur kis ko mere jine se ilaqa hoga

aur kis ko mire jiine se ilāqa hogā

koī hogā mirā qātil to masīhā hogā

bhiiḌ kī bhiiḌ use DhūñDne niklī hogī

ek vo shaḳhs jo har bhiiḌ meñ tanhā hogā

ret meñ pyaas ke dozaḳh ke sivā kuchh bhī nahīñ

mere sūkhe hue hoñToñ meñ hī dariyā hogā

dekh kar tujh ko jo nam ho ga.iiñ merī āñkheñ

tujh pe jo vaqt paḌā mujh pe bhī guzrā hogā

bas isī dhun meñ pas-o-pesh na dekhā ham ne

us ke aage bhī zarā dekh to leñ kyā hogā

maiñ to badnām bhī huuñ shahr meñ barbād bhī huuñ

aap ko baat nibhāne kā salīqa hogā

mar ga.e raah pe ye aas liye āñkhoñ meñ

koī murda to kisī siine meñ zinda hogā

yūñhī to rauñdte phirte nahīñ be-ḳhauf-o-ḳhatar

tum ne lāshoñ se hī ye shahr basāyā hogā

baat kuchh hogī javānī ke dinoñ se 'qaisī'

qais se apnā ta'alluq jo batātā hogā

aur kis ko mere jine se ilaqa hoga

koi hoga mera qatil to masiha hoga

bhiD ki bhiD use DhunDne nikli hogi

ek wo shaKHs jo har bhiD mein tanha hoga

ret mein pyas ke dozaKH ke siwa kuchh bhi nahin

mere sukhe hue honTon mein hi dariya hoga

dekh kar tujh ko jo nam ho gain meri aankhen

tujh pe jo waqt paDa mujh pe bhi guzra hoga

bas isi dhun mein pas-o-pesh na dekha hum ne

us ke aage bhi zara dekh to len kya hoga

main to badnam bhi hun shahr mein barbaad bhi hun

aap ko baat nibhane ka saliqa hoga

mar gae rah pe ye aas liye aankhon mein

koi murda to kisi sine mein zinda hoga

yunhi to raundte phirte nahin be-KHauf-o-KHatar

tum ne lashon se hi ye shahr basaya hoga

baat kuchh hogi jawani ke dinon se 'qaisi'

qais se apna ta'alluq jo batata hoga