aur kis tarah use koi qaba di jae

aur kis tarah use koī qabā dī jaa.e

ek tasvīr hī patthar pe banā dī jaa.e

taaki phir koī na parchhā.īñ ke pīchhe dauḌe

apnī bastī meñ chalo aag lagā dī jaa.e

ḳhuub hai ye mirī maḳhsūs tabī.at kā ilaaj

har tamannā mirī kāñToñ pe sulā dī jaa.e

apnī hī zaat pe hotā hai jo saa.e kā gumāñ

tīrgī shab kī kisī taur baḌhā dī jaa.e

ham kisī tarah to imroz kī talḳhī samjheñ

ahd-e-rafta kī har ik baat bhulā dī jaa.e

aao dekheñ na koī apnā shanāsā nikle

ajnabī chehroñ se ye gard haTā dī jaa.e

dekhne se jise āñkhoñ meñ añdherā chhāyā

kis ko is ḳhvāb kī ta.abīr batā dī jaa.e

jab muqaddar hai shab-o-roz kī be-kaifī 'sabā'

ḳhvāb kī tarah har ik yaad bhulā dī jaa.e

aur kis tarah use koi qaba di jae

ek taswir hi patthar pe bana di jae

taki phir koi na parchhain ke pichhe dauDe

apni basti mein chalo aag laga di jae

KHub hai ye meri maKHsus tabiat ka ilaj

har tamanna meri kanTon pe sula di jae

apni hi zat pe hota hai jo sae ka guman

tirgi shab ki kisi taur baDha di jae

hum kisi tarah to imroz ki talKHi samjhen

ahd-e-rafta ki har ek baat bhula di jae

aao dekhen na koi apna shanasa nikle

ajnabi chehron se ye gard haTa di jae

dekhne se jise aankhon mein andhera chhaya

kis ko is KHwab ki tabir bata di jae

jab muqaddar hai shab-o-roz ki be-kaifi 'saba'

KHwab ki tarah har ek yaad bhula di jae