aur to dharti pe kab kaise kahan ugta namak

aur to dhartī pe kab kaise kahāñ ugtā namak

ham ne aksar nai-shakar boyā hai aur kaaTā namak

us ruḳh-e-gul-rang par kajlāhaTeñ sī dhuup kī

jaise shīrīnī meñ koī ghol de thoḌā namak

lazzat-e-āzār jab pāmāl ho to aur lutf

zaḳhm ko vo duur hī se kaash dikhlātā namak

vo ta'alluq meñ ravā rakhtā hai lutf-o-jaur saath

yā'nī is mashrūb meñ aadhī shakar aadhā namak

ghul rahā ho jab fazā meñ ek tīkhā zā.iqa

sarsarātā hai havāoñ meñ bhī tab goyā namak

ret kar dete haiñ chaTTānoñ ko mausam ke bhañvar

maiñ to phir barsāt kī bhīgī havā khātā namak

ghar kī dīvāroñ ko mere jitnā luuni khā ga.ī

utnā maiñ ne zindagī kā hai kahāñ khāyā namak

jab samundar chaḌh ke mere sar ke uupar aa gayā

kaan meñ ik lahr bolī kaise kuchh chakkhā namak

vo namakdāñ hai sarāpā shoḳh chanchal sāñvrā

us kī murlī ke suroñ meñ bhī hai lahrātā namak

aur to dharti pe kab kaise kahan ugta namak

hum ne aksar nai-shakar boya hai aur kaTa namak

us ruKH-e-gul-rang par kajlahaTen si dhup ki

jaise shirini mein koi ghol de thoDa namak

lazzat-e-azar jab pamal ho to aur lutf

zaKHm ko wo dur hi se kash dikhlata namak

wo ta'alluq mein rawa rakhta hai lutf-o-jaur sath

ya'ni is mashrub mein aadhi shakar aadha namak

ghul raha ho jab faza mein ek tikha zaiqa

sarsaraata hai hawaon mein bhi tab goya namak

ret kar dete hain chaTTanon ko mausam ke bhanwar

main to phir barsat ki bhigi hawa khata namak

ghar ki diwaron ko mere jitna luni kha gai

utna main ne zindagi ka hai kahan khaya namak

jab samundar chaDh ke mere sar ke upar aa gaya

kan mein ek lahr boli kaise kuchh chakkha namak

wo namakdan hai sarapa shoKH chanchal sanwra

us ki murli ke suron mein bhi hai lahraata namak