auron mein KHud ko jaan-ba-lab DhunDte rahe

auroñ meñ ḳhud ko jān-ba-lab DhūñDte rahe

ġhairoñ meñ apnā nām-o-nasab DhūñDte rahe

sūraj to raushnī ke sahīfoñ meñ qaid thā

ham sab use pas-e-ruḳh-e-shab DhūñDte rahe

jo thā hamāre saath har ik rang meñ use

patthar kī ik havelī meñ sab DhūñDte rahe

dhokā thā vo nazar kā magar is kā kyā kaheñ

duniyā kī bhiiḌ meñ use jab DhūñDte rahe

vo thā tire mire rag-e-jāñ ke hisār meñ

dair-o-haram meñ hī use jab DhūñDte rahe

miltā nahīñ sukūñ tirī bazm-e-hayāt meñ

jiite jī ham to maut ke Dhab DhūñDte rahe

auron mein KHud ko jaan-ba-lab DhunDte rahe

ghairon mein apna nam-o-nasab DhunDte rahe

suraj to raushni ke sahifon mein qaid tha

hum sab use pas-e-ruKH-e-shab DhunDte rahe

jo tha hamare sath har ek rang mein use

patthar ki ek haweli mein sab DhunDte rahe

dhoka tha wo nazar ka magar is ka kya kahen

duniya ki bhiD mein use jab DhunDte rahe

wo tha tere mere rag-e-jaan ke hisar mein

dair-o-haram mein hi use jab DhunDte rahe

milta nahin sukun teri bazm-e-hayat mein

jite ji hum to maut ke Dhab DhunDte rahe