awwal wahi sairab tha sani bhi wahi tha

avval vahī sairāb thā saanī bhī vahī thā

patthar se guzartā huā paanī bhī vahī thā

nau-ḳhez duāoñ kā shajar-kār bhī niklā

bosīda tamannāoñ kā baanī bhī vahī thā

āñkhoñ pe jo rakhtā rahā rūmāl-e-tasallī

nam-dīda-gar-e-naql-e-makānī bhī vahī thā

āyāt-e-irāda pe vahī nuur kī uñglī

aurāq-siyah-tar kā giyānī bhī vahī thā

kaukab sā damaktā thā dhueñ meñ gul-e-shīsha

arzañg bichhā.e hue maanī bhī vahī thā

'tafzīl' thā ik āmad-o-ilhām kā shā.ir

baaqī vahī urdu meñ hai faanī bhī vahī thā

awwal wahi sairab tha sani bhi wahi tha

patthar se guzarta hua pani bhi wahi tha

nau-KHez duaon ka shajar-kar bhi nikla

bosida tamannaon ka bani bhi wahi tha

aankhon pe jo rakhta raha rumal-e-tasalli

nam-dida-gar-e-naql-e-makani bhi wahi tha

aayat-e-irada pe wahi nur ki ungli

auraq-siyah-tar ka giyani bhi wahi tha

kaukab sa damakta tha dhuen mein gul-e-shisha

arzang bichhae hue mani bhi wahi tha

'tafzil' tha ek aamad-o-ilham ka shair

baqi wahi urdu mein hai fani bhi wahi tha