ayagh-e-dil na bhara tha magar chhalak bhi gaya

ayāġh-e-dil na bharā thā magar chhalak bhī gayā

ki ek qatra-e-ḳhūñ kar ke nam palak bhī gayā

badan qafas sahī rūheñ bhī āshnā na huiiñ

tirī talāsh meñ hadd-e-junūñ talak bhī gayā

kuchh is ko paane kā tab bhī yaqīñ thā ab bhī nahīñ

dikhā ke garche vo mauhūm sī jhalak bhī gayā

rasā huā na huā bhed khul nahīñ paayā

jo ek nāla-e-shab jānib-e-falak bhī gayā

ridā-e-abr balā-e-havā se chaak huī

to kyā hai sar se jo āñchal tirā Dhalak bhī gayā

sirā bhī haath meñ thā kholne kī fikr bhī thī

magar vo uqda-e-pur-pech-o-gunjlak bhī gayā

ye ins-o-jān sadā se ḳhatā ke putle the

pa ho ke rāñda-e-dargāh ab malak bhī gayā

ayagh-e-dil na bhara tha magar chhalak bhi gaya

ki ek qatra-e-KHun kar ke nam palak bhi gaya

badan qafas sahi ruhen bhi aashna na huin

teri talash mein hadd-e-junun talak bhi gaya

kuchh is ko pane ka tab bhi yaqin tha ab bhi nahin

dikha ke garche wo mauhum si jhalak bhi gaya

rasa hua na hua bhed khul nahin paya

jo ek nala-e-shab jaanib-e-falak bhi gaya

rida-e-abr bala-e-hawa se chaak hui

to kya hai sar se jo aanchal tera Dhalak bhi gaya

sira bhi hath mein tha kholne ki fikr bhi thi

magar wo uqda-e-pur-pech-o-gunjlak bhi gaya

ye ins-o-jaan sada se KHata ke putle the

pa ho ke randa-e-dargah ab malak bhi gaya