ayan dekhte hain nihan dekhte hain

'ayāñ dekhte haiñ nihāñ dekhte haiñ

vahī jalva-gar hai jahāñ dekhte haiñ

hai dair-o-haram us se mansūb lekin

jahāñ hai vo ham bhī kahāñ dekhte haiñ

banī hai jo parda vo hastī hai apnī

vahī hai jise darmiyāñ dekhte haiñ

maze jis ne chakkhe hoñ terī galī ke

kahāñ phir vo sū-e-jināñ dekhte haiñ

jabīñ ko hai nisbat usī sang-e-dar se

jise jhuk ke haft-āsmāñ dekhte haiñ

na jāneñ judā juzv ko kul se jo bhī

vo kasrat se vahdat 'ayāñ dekhte haiñ

'muzammil' jo hastī miTāte haiñ apnī

vahī be-nishāñ kā nishāñ dekhte haiñ

'ayan dekhte hain nihan dekhte hain

wahi jalwa-gar hai jahan dekhte hain

hai dair-o-haram us se mansub lekin

jahan hai wo hum bhi kahan dekhte hain

bani hai jo parda wo hasti hai apni

wahi hai jise darmiyan dekhte hain

maze jis ne chakkhe hon teri gali ke

kahan phir wo su-e-jinan dekhte hain

jabin ko hai nisbat usi sang-e-dar se

jise jhuk ke haft-asman dekhte hain

na jaanen juda juzw ko kul se jo bhi

wo kasrat se wahdat 'ayan dekhte hain

'muzammil' jo hasti miTate hain apni

wahi be-nishan ka nishan dekhte hain