az-had sawal-e-wasl pe israr ho chuka

az-had savāl-e-vasl pe isrār ho chukā

iqrār ab to kījiye inkār ho chukā

vo ārzū-e-dil se ḳhabar-dār ho chukā

tamhīd-e-vasl sunte hī hushiyār ho chukā

saaqī jo tere jaam se sarshār ho chukā

bas roz-e-hashr tak bhī vo hushiyār ho chukā

ab lan-tarānī-o-arinī ke vo din kahāñ

ḳhud faiz-e-ishq-e-yār se maiñ yaar ho chukā

tajvīz meñ sazā kī kalām ab nahīñ rahā

ḳhud mujh se jurm-e-ishq kā iz.hār ho chukā

saffāk rahm aaya mire dil pe kab tujhe

jab tiir ġharq tā-lab-e-sūfār ho chukā

ab mere haal par na sitamgār rahm kar

ye dil rahīn-e-lazzat-e-āzār ho chukā

pahuñchāyā zo.af ne mujhe jab bazm-e-yār tak

barḳhāst log ho ga.e darbār ho chukā

is meñ qasam ḳhudā kī buto jhuuT kuchh nahīñ

maiñ tum se ishq kar ke gunahgār ho chukā

bad-nāmiyoñ kā ḳhauf mujhe ab nahīñ rahā

rusvā-e-ḳhalq maiñ sar-e-bāzār ho chukā

ab iztirāb kyoñ hai zarūrat hai sabr kī

'sābir' jab un ko vasl kā iqrār ho chukā

az-had sawal-e-wasl pe israr ho chuka

iqrar ab to kijiye inkar ho chuka

wo aarzu-e-dil se KHabar-dar ho chuka

tamhid-e-wasl sunte hi hushiyar ho chuka

saqi jo tere jam se sarshaar ho chuka

bas roz-e-hashr tak bhi wo hushiyar ho chuka

ab lan-tarani-o-arini ke wo din kahan

KHud faiz-e-ishq-e-yar se main yar ho chuka

tajwiz mein saza ki kalam ab nahin raha

KHud mujh se jurm-e-ishq ka izhaar ho chuka

saffak rahm aaya mere dil pe kab tujhe

jab tir gharq ta-lab-e-sufar ho chuka

ab mere haal par na sitamgar rahm kar

ye dil rahin-e-lazzat-e-azar ho chuka

pahunchaya zoaf ne mujhe jab bazm-e-yar tak

barKHast log ho gae darbar ho chuka

is mein qasam KHuda ki buto jhuT kuchh nahin

main tum se ishq kar ke gunahgar ho chuka

bad-namiyon ka KHauf mujhe ab nahin raha

ruswa-e-KHalq main sar-e-bazar ho chuka

ab iztirab kyon hai zarurat hai sabr ki

'sabir' jab un ko wasl ka iqrar ho chuka