azab-e-dil se kabhi karb-e-jaan se guzrega

'azāb-e-dil se kabhī karb-e-jāñ se guzregā

jo sach kahegā ġham-e-bekarāñ se guzregā

abhī na band karo maqtaloñ ke darvāze

abhī ik aur masīhā yahāñ se guzregā

chaman chaman meñ khaḌe haiñ ḳhizāñ ke pahre-dār

julūs-e-fasl-e-bahārāñ kahāñ se guzregā

ye inqalāb kā pahlū bhī kis ne sochā thā

ḳhizāñ ke baa'd gulistāñ ḳhizāñ se guzregā

koī bhī fitna ho yaaro kahīñ bhī barpā ho

hamāre shahr hamāre makāñ se guzregā

maqām-e-sūd-o-ziyāñ ho ki arz-e-dār-o-rasan

guzarne vaalā har ik imtihāñ se guzregā

ravish ravish pe sajā do guloñ kī qindīleñ

ki aaj jān-e-chaman gulsitāñ se guzregā

jabīn-e-vaqt ke tevar batā rahe haiñ 'azīz'

ki fard-fard abhī imtihāñ se guzregā

'azab-e-dil se kabhi karb-e-jaan se guzrega

jo sach kahega gham-e-bekaran se guzrega

abhi na band karo maqtalon ke darwaze

abhi ek aur masiha yahan se guzrega

chaman chaman mein khaDe hain KHizan ke pahre-dar

julus-e-fasl-e-bahaaran kahan se guzrega

ye inqalab ka pahlu bhi kis ne socha tha

KHizan ke ba'd gulistan KHizan se guzrega

koi bhi fitna ho yaro kahin bhi barpa ho

hamare shahr hamare makan se guzrega

maqam-e-sud-o-ziyan ho ki arz-e-dar-o-rasan

guzarne wala har ek imtihan se guzrega

rawish rawish pe saja do gulon ki qindilen

ki aaj jaan-e-chaman gulsitan se guzrega

jabin-e-waqt ke tewar bata rahe hain 'aziz'

ki fard-fard abhi imtihan se guzrega