azab ho gai zanjir-e-dast-o-pa mujhko

azaab ho ga.ī zanjīr-e-dast-o-pā mujh ko

jo ho sake to kahīñ daar pe chaḌhā mujh ko

taras gayā huuñ maiñ sūraj kī raushnī ke liye

vo dī hai sāya-e-dīvār ne sazā mujh ko

jo dekhe to isī se hai zindagī mere

magar miTā bhī rahī hai yahī havā mujh ko

usī nazar ne mujhe toḌ kar bikher diyā

usī nazar ne banāyā thā ā.īna mujh ko

sarāb-e-umr-e-tamannā kī tishnagī huuñ maiñ

agar hai chashma-e-faiyāz to bujhā mujh ko

kabhī to apne badan ke charāġh raushan kar

kabhī to apne lahū se bhī aazmā mujh ko

azab ho gai zanjir-e-dast-o-pa mujh ko

jo ho sake to kahin dar pe chaDha mujh ko

taras gaya hun main suraj ki raushni ke liye

wo di hai saya-e-diwar ne saza mujh ko

jo dekhe to isi se hai zindagi mere

magar miTa bhi rahi hai yahi hawa mujh ko

usi nazar ne mujhe toD kar bikher diya

usi nazar ne banaya tha aaina mujh ko

sarab-e-umr-e-tamanna ki tishnagi hun main

agar hai chashma-e-faiyaz to bujha mujh ko

kabhi to apne badan ke charagh raushan kar

kabhi to apne lahu se bhi aazma mujh ko