azal ke din jinhen dekha tha bazm-e-husn-e-pinhan mein

azal ke din jinheñ dekhā thā bazm-e-husn-e-pinhāñ meñ

simaT aa.eñ vahī ra.anā.iyāñ tasvīr-e-jānāñ meñ

mirā zauq-e-nazar ab us maqām-e-āshiqī par hai

jahāñ uljhā huā hai husn bhī ḳhvāb-e-pareshāñ meñ

baḌhā de kaash koī vus.ateñ anvār-e-ma.anī kī

mujhe tarmīm karnā hai mazāq-e-chashm-e-hairāñ meñ

abhī gunjā.isheñ dekhī kahāñ haiñ ahl-e-ālam ne

samā jā ai ajal aa tū bhī ḳhalvat-ḳhāna-e-jāñ meñ

har ik tār-e-garebāñ hāsil-e-sad-barq-e-aiman hai

ḳhudā-ma.alūm kitne husn haiñ chāk-e-garebāñ meñ

ḳhudā rakkhe mire dāman meñ hai ik phuul aisā bhī

khaTaktā hai jo kāñTe kī tarah chashm-e-gulistāñ meñ

azal ke roz se arsh-o-malā.ik sajda karte haiñ

koī to baat hai ai 'ārzū' tarkīb-e-insāñ meñ

azal ke din jinhen dekha tha bazm-e-husn-e-pinhan mein

simaT aaen wahi ranaiyan taswir-e-jaanan mein

mera zauq-e-nazar ab us maqam-e-ashiqi par hai

jahan uljha hua hai husn bhi KHwab-e-pareshan mein

baDha de kash koi wusaten anwar-e-mani ki

mujhe tarmim karna hai mazaq-e-chashm-e-hairan mein

abhi gunjaishen dekhi kahan hain ahl-e-alam ne

sama ja ai ajal aa tu bhi KHalwat-KHana-e-jaan mein

har ek tar-e-gareban hasil-e-sad-barq-e-aiman hai

KHuda-malum kitne husn hain chaak-e-gareban mein

KHuda rakkhe mere daman mein hai ek phul aisa bhi

khaTakta hai jo kanTe ki tarah chashm-e-gulistan mein

azal ke roz se arsh-o-malaik sajda karte hain

koi to baat hai ai 'arzu' tarkib-e-insan mein