azal ki yaad mein main garm-e-ah-e-sard hua

azal kī yaad meñ maiñ garm-e-āh-e-sard huā

lagī thī choT kabhī aur aaj dard huā

guzar gayā ye nigāhoñ se terā markab-e-husn

tamām ālam-e-dil ik qadam meñ gard huā

ġhalat ki qābil-e-dār-o-rasan hoñ ahl-e-havas

bañdhā.ī ishq ne himmat jise vo mard huā

pare vo aql se haiñ is yaqīñ ne rok liyā

kabhī jo vahm ke pīchhe meñ rah-navard huā

tamām tajraba-e-garm-o-sard-e-ishq kahāñ

kuchh ashk-e-garm huā dil kuchh āh-e-sard huā

naqāb un kī uThī thī ki ham hue behosh

nigāh un se laḌī thī ki dil meñ dard huā

karam se apne miTā do ki be-qarār hai ishq

mirā vajūd ki duniyā ke dil kā dard huā

shuhūd-e-be-jihat-o-kaif munsalik 'rāġhib'

junūñ use jo kisī samt rah-navard huā

azal ki yaad mein main garm-e-ah-e-sard hua

lagi thi choT kabhi aur aaj dard hua

guzar gaya ye nigahon se tera markab-e-husn

tamam aalam-e-dil ek qadam mein gard hua

ghalat ki qabil-e-dar-o-rasan hon ahl-e-hawas

bandhai ishq ne himmat jise wo mard hua

pare wo aql se hain is yaqin ne rok liya

kabhi jo wahm ke pichhe mein rah-naward hua

tamam tajraba-e-garm-o-sard-e-ishq kahan

kuchh ashk-e-garm hua dil kuchh aah-e-sard hua

naqab un ki uThi thi ki hum hue behosh

nigah un se laDi thi ki dil mein dard hua

karam se apne miTa do ki be-qarar hai ishq

mera wajud ki duniya ke dil ka dard hua

shuhud-e-be-jihat-o-kaif munsalik 'raghib'

junun use jo kisi samt rah-naward hua