azal se apne hi hone ke intizar mein hun

azal se apne hī hone ke intizār meñ huuñ

numū-pazīr huuñ lekin tire hisār meñ huuñ

kahāñ patā thā ki apnā hī pesh-o-pas huuñ maiñ

kise ḳhabar thī ki tanhā khaḌā qatār meñ huuñ

tire vajūd kī har dhuup chhāñv hai jis meñ

maiñ reza-reza usī ḳhāk-e-rahguzār meñ huuñ

yahīñ kahīñ tirī nazroñ se gir ke bikhrūñgā

maiñ shāḳh-e-sabz abhī mausam-e-bahār meñ huuñ

sadā-e-abr idhar bhī koī ki tere liye

maiñ pā-ba-jaulāñ bahut dasht-e-be-kanār meñ huuñ

farār chāhūñ to jo kuchh hai sab gañvā baiThūñ

kuchh is tarah tirī āvāz ke hisār meñ huuñ

batā gayā thā patā bas yūñhī havāoñ ko

kahāñ ḳhabar thī ki maiñ bhī tire shumār meñ huuñ

alag na dekh bahut zard zard phūloñ se

nazar uThā ki maiñ chāroñ taraf bahār meñ huuñ

maiñ harf-harf tujhe jism-o-jāñ meñ le jā.ūñ

ki rang-rang tirī lauTtī bahār meñ huuñ

bikhar chukā hai vo 'ajmal' sadā.eñ de ke mujhe

ki maiñ asiir havāoñ ke kār-zār meñ huuñ

azal se apne hi hone ke intizar mein hun

numu-pazir hun lekin tere hisar mein hun

kahan pata tha ki apna hi pesh-o-pas hun main

kise KHabar thi ki tanha khaDa qatar mein hun

tere wajud ki har dhup chhanw hai jis mein

main reza-reza usi KHak-e-rahguzar mein hun

yahin kahin teri nazron se gir ke bikhrunga

main shaKH-e-sabz abhi mausam-e-bahaar mein hun

sada-e-abr idhar bhi koi ki tere liye

main pa-ba-jaulan bahut dasht-e-be-kanar mein hun

farar chahun to jo kuchh hai sab ganwa baiThun

kuchh is tarah teri aawaz ke hisar mein hun

bata gaya tha pata bas yunhi hawaon ko

kahan KHabar thi ki main bhi tere shumar mein hun

alag na dekh bahut zard zard phulon se

nazar uTha ki main chaaron taraf bahaar mein hun

main harf-harf tujhe jism-o-jaan mein le jaun

ki rang-rang teri lauTti bahaar mein hun

bikhar chuka hai wo 'ajmal' sadaen de ke mujhe

ki main asir hawaon ke kar-zar mein hun