azal se go mazaq-e-ahl-e-duniya aur hi kuchh hai

azal se go mazāq-e-ahl-e-duniyā aur hī kuchh hai

haqīqat meñ magar jiine kā manshā aur hī kuchh hai

mohabbat ne sikhā dī haiñ ma.āl-andeshiyāñ mujh ko

mire nazdīk mafhūm-e-tamanna aur hī kuchh hai

jabīn-e-shauq pāband-e-ta’ayyun ho nahīñ saktī

mazāq-e-justujū-e-dair-o-kā'ba aur hī kuchh hai

mohabbat meñ dil-e-māyūs ko ye kaun samjhā.e

ki un kī kam-nigāhī kā taqāzā aur hī kuchh hai

ye mehr-o-māh kī tābāniyāñ dhoka na deñ mujh ko

mirī āñkhoñ meñ vo jān-e-tamāshā aur hī kuchh hai

mujhe go imtiyāz-e-manzil-e-jānāñ nahīñ lekin

samajhtā huuñ ki vaj.h-e-laġhzish-e-pā aur hī kuchh hai

'hazīñ' minnat-kash-e-jām-o-subū hone se kyā hāsil

kisī kī mast nazroñ kā taqāzā aur hī kuchh hai

azal se go mazaq-e-ahl-e-duniya aur hi kuchh hai

haqiqat mein magar jine ka mansha aur hi kuchh hai

mohabbat ne sikha di hain maal-andeshiyan mujh ko

mere nazdik mafhum-e-tamanna aur hi kuchh hai

jabin-e-shauq paband-e-ta’ayyun ho nahin sakti

mazaq-e-justuju-e-dair-o-ka'ba aur hi kuchh hai

mohabbat mein dil-e-mayus ko ye kaun samjhae

ki un ki kam-nigahi ka taqaza aur hi kuchh hai

ye mehr-o-mah ki tabaniyan dhoka na den mujh ko

meri aankhon mein wo jaan-e-tamasha aur hi kuchh hai

mujhe go imtiyaz-e-manzil-e-jaanan nahin lekin

samajhta hun ki wajh-e-laghzish-e-pa aur hi kuchh hai

'hazin' minnat-kash-e-jam-o-subu hone se kya hasil

kisi ki mast nazron ka taqaza aur hi kuchh hai