azal se ham-safar kya ham-muqaddar tak nahin milte

azal se ham-safar kyā ham-muqaddar tak nahīñ milte

kināre āb-e-dariyā ke samundar tak nahīñ milte

bachā ābād āñkhoñ ko bahut ronā nahīñ achchhā

jahāñ sailāb aate haiñ vahāñ ghar tak nahīñ milte

guzargāheñ ye raaz afshā nahīñ kartīñ jahāñ pahle

bahut ūñche mahal the un ko patthar tak nahīñ milte

zamīñ kā ḳhalfishār is tarh sab par saya-afgan hai

gharoñ kī chār-dīvārī meñ ab dar tak nahīñ milte

'razī' ab nasl-e-ādam par kuchh aisā qaht-e-insāñ hai

musalmāñ kyā is ābādī meñ kāfir tak nahīñ milte

azal se ham-safar kya ham-muqaddar tak nahin milte

kinare aab-e-dariya ke samundar tak nahin milte

bacha aabaad aankhon ko bahut rona nahin achchha

jahan sailab aate hain wahan ghar tak nahin milte

guzargahen ye raaz afsha nahin kartin jahan pahle

bahut unche mahal the un ko patthar tak nahin milte

zamin ka KHalfishaar is tarh sab par saya-afgan hai

gharon ki chaar-diwari mein ab dar tak nahin milte

'razi' ab nasl-e-adam par kuchh aisa qaht-e-insan hai

musalman kya is aabaadi mein kafir tak nahin milte