azal se suni ujaD basti mein koi mehman hua nahin hai

azal se suunī ujaaḌ bastī meñ koī mehmāñ huā nahīñ hai

koī bhī naġhma-sarā nahīñ hai kahīñ bhī rang-e-hinā nahīñ hai

barahna shāḳhoñ ko aarzū thī kabhī to barg-o-samar bhī hote

khulī fazāoñ ko takte rahne meñ zindagī kā mazā nahīñ hai

abhī to tūfāñ ḳhamoshiyoñ kī ridā-e-sangīñ meñ pal rahe haiñ

sukūt TuuTe bhī kis tarah se kisī ne dil ko chhuā nahīñ hai

tamām hone ko aa.e lamhe gine ginā.e the zindagī ke

magar vo tāb-o-tab-e-nafas hai ki jaise sūraj Dhalā nahīñ hai

vo raste raste bhaTakne vaale tamām din kī tapish ke maare

jo paa.eñ manzil ko shaam phūle to is meñ kuchh bhī burā nahīñ hai

jo rah-navardoñ ko pā-ba-jaulāñ na rakh sake tā-savād-e-manzil

vo shor-o-ġhauġhā-e-rahravāñ hai vo merī hargiz navā nahīñ hai

jagāo 'rizvāñ' ko is se pahle ki aañkh lagne kā vaqt aa.e

abhī to taare chamak rahe haiñ abhī saverā huā nahīñ hai

azal se suni ujaD basti mein koi mehman hua nahin hai

koi bhi naghma-sara nahin hai kahin bhi rang-e-hina nahin hai

barahna shaKHon ko aarzu thi kabhi to barg-o-samar bhi hote

khuli fazaon ko takte rahne mein zindagi ka maza nahin hai

abhi to tufan KHamoshiyon ki rida-e-sangin mein pal rahe hain

sukut TuTe bhi kis tarah se kisi ne dil ko chhua nahin hai

tamam hone ko aae lamhe gine ginae the zindagi ke

magar wo tab-o-tab-e-nafas hai ki jaise suraj Dhala nahin hai

wo raste raste bhaTakne wale tamam din ki tapish ke mare

jo paen manzil ko sham phule to is mein kuchh bhi bura nahin hai

jo rah-nawardon ko pa-ba-jaulan na rakh sake ta-sawad-e-manzil

wo shor-o-ghaugha-e-rahrawan hai wo meri hargiz nawa nahin hai

jagao 'rizwan' ko is se pahle ki aankh lagne ka waqt aae

abhi to tare chamak rahe hain abhi sawera hua nahin hai