azal se ta-ba-abad misl-e-ab KHamoshi

azal se tā-ba-abad misl-e-āb ḳhāmoshī

safar meñ gum hai ye mauj-e-sarāb ḳhāmoshī

navā kī zulmat-e-sail-e-ravāñ se niklo tum

diyā jalāo ki hai be-hisāb ḳhāmoshī

ajiib ronā sisaknā navāh-e-jān meñ thā

phir us ke baad huī be-naqāb ḳhāmoshī

hamārī zaat ke andar shu.ūr-e-zāt yahī

samundaroñ kā yahī iztirāb ḳhāmoshī

maiñ apnī sūrat-e-mub.ham ko dekhtā kaise

ki aa.ine meñ huī āftāb ḳhāmoshī

na koī harf-e-tamannā na koī harf-e-vafā

huzūr-e-yār huī bāryāb ḳhāmoshī

ḳhud apnā ilm-o-hunar dekhne ko nikle the

huī hai ham ko magar dastiyāb ḳhāmoshī

tire hurūf-e-badan ko na paḌh sakī dam-bhar

bas ik jhalak meñ huī āb-āb ḳhāmoshī

miyān-e-sahn-e-chaman fasl-e-ḳhvāb kā mātam

chukā rahī hai purānā hisāb ḳhāmoshī

ik inqalāb havā meñ sadā.eñ detā hai

zamīñ meñ chīḳh rahī hai janāb ḳhāmoshī

sahal na jaan ye ġhauġhā-e-shor-e-dil 'ajmal'

pas-e-numūd-e-tamanna azaab ḳhāmoshī

azal se ta-ba-abad misl-e-ab KHamoshi

safar mein gum hai ye mauj-e-sarab KHamoshi

nawa ki zulmat-e-sail-e-rawan se niklo tum

diya jalao ki hai be-hisab KHamoshi

ajib rona sisakna nawah-e-jaan mein tha

phir us ke baad hui be-naqab KHamoshi

hamari zat ke andar shuur-e-zat yahi

samundaron ka yahi iztirab KHamoshi

main apni surat-e-mubham ko dekhta kaise

ki aaine mein hui aaftab KHamoshi

na koi harf-e-tamanna na koi harf-e-wafa

huzur-e-yar hui baryab KHamoshi

KHud apna ilm-o-hunar dekhne ko nikle the

hui hai hum ko magar dastiyab KHamoshi

tere huruf-e-badan ko na paDh saki dam-bhar

bas ek jhalak mein hui aab-ab KHamoshi

miyan-e-sahn-e-chaman fasl-e-KHwab ka matam

chuka rahi hai purana hisab KHamoshi

ek inqalab hawa mein sadaen deta hai

zamin mein chiKH rahi hai janab KHamoshi

sahal na jaan ye ghaugha-e-shor-e-dil 'ajmal'

pas-e-numud-e-tamanna azab KHamoshi