aziz aae madad ko na gham-gusar aae

'azīz aa.e madad ko na ġham-gusār aa.e

zamāne-bhar ko musībat meñ ham pukār aa.e

samajh sakī na ḳhirad jab tire ishāre ko

junūñ-nasīb hamīñ the jo sū-e-dār aa.e

milegā tohfa-e-dil ke 'evaz nashāt ki ġham

kise ḳhabar hai ki jiit aa.e ham ki haar aa.e

junūñ kī ābla-pā.ī se phuul khilte ga.e

na jaane kitne bayābān ham nikhār aa.e

hamāre paas bhī kahne ko haiñ bahut bāteñ

magar kahe kā hamāre jo e'tibār aa.e

shikast-e-jām pe ro.e shikast-e-dil pe hañse

kuchh aise lamhe bhī 'jāved' ham guzār aa.e

'aziz aae madad ko na gham-gusar aae

zamane-bhar ko musibat mein hum pukar aae

samajh saki na KHirad jab tere ishaare ko

junun-nasib hamin the jo su-e-dar aae

milega tohfa-e-dil ke 'ewaz nashat ki gham

kise KHabar hai ki jit aae hum ki haar aae

junun ki aabla-pai se phul khilte gae

na jaane kitne bayaban hum nikhaar aae

hamare pas bhi kahne ko hain bahut baaten

magar kahe ka hamare jo e'tibar aae

shikast-e-jam pe roe shikast-e-dil pe hanse

kuchh aise lamhe bhi 'jawed' hum guzar aae