aziyyaton se nikalne ka mashwara deti

aziyyatoñ se nikalne kā mashvara detī

maiñ us kī thī to nahīñ phir bhī hausla detī

kisī azaab se kam to nahīñ hai ḳhush rahnā

duā ke naam pe kyuuñ us ko bad-duā detī

chhupā bhī letī mire bhed ko agar bil-farz

havā kā kyā hai koī aur gul khilā detī

bajā ki sahl na thā us kā ham-safar honā

kam az kam us ko palaTne kā rāsta detī

jo mujh se ishq ke qisse sunātā phirtā thā

kahīñ vo miltā to maiñ us ko aa.ina detī

mire ḳhudā koī masraf to hotā ashkoñ kā

fasīl-e-shahr kī tahrīr hī miTā detī

ḳhudā gavāh ki sar se jhaTak ke dekh liyā

nahīñ thā bas meñ vagarna use bhulā detī

maiñ us kī ḳhaas ināyat se bach ga.ī huuñ 'qamar'

vagarna ḳhalq-e-ḳhudā to mujhe miTā detī

aziyyaton se nikalne ka mashwara deti

main us ki thi to nahin phir bhi hausla deti

kisi azab se kam to nahin hai KHush rahna

dua ke nam pe kyun us ko bad-dua deti

chhupa bhi leti mere bhed ko agar bil-farz

hawa ka kya hai koi aur gul khila deti

baja ki sahl na tha us ka ham-safar hona

kam az kam us ko palaTne ka rasta deti

jo mujh se ishq ke qisse sunata phirta tha

kahin wo milta to main us ko aaina deti

mere KHuda koi masraf to hota ashkon ka

fasil-e-shahr ki tahrir hi miTa deti

KHuda gawah ki sar se jhaTak ke dekh liya

nahin tha bas mein wagarna use bhula deti

main us ki KHas inayat se bach gai hun 'qamar'

wagarna KHalq-e-KHuda to mujhe miTa deti