ba-asani kahin shadan dil-e-nashad hota hai

ba-āsānī kahīñ shādāñ dil-e-nāshād hotā hai

baḌī barbādiyoñ kai ba.ad ye ābād hotā hai

Thahar ai gardish-e-daurāñ vo lab jumbish meñ aate haiñ

sarāpā gosh ho kar sun ki kyā irshād hotā hai

dar-e-sāqī se āzād-e-do-ālam uTh nahīñ saktā

quyūd-e-maz.hab-o-millat se riñd āzād hotā hai

guzishta hāl-e-ulfat kyā sunoge kyā sunā.ūñgā

ye qissa kuchh kahīñ se kuchh kahīñ se yaad hotā hai

payām-e-sad-musībat jāntā huuñ ik tabassum ko

laraz jaatā huuñ jis din ḳhush dil-e-nāshād hotā hai

qafas kī titliyoñ uTho gale mil lo lipaT jaao

ki qaid-e-zindagī se ik asiir āzād hotā hai

kahāñ pahlī sī 'qaisar' rasm-e-shāgirdī-o-ustādī

jo ik misra.a bhī kah letā hai ab ustād hotā hai

ba-asani kahin shadan dil-e-nashad hota hai

baDi barbaadiyon kai baad ye aabaad hota hai

Thahar ai gardish-e-dauran wo lab jumbish mein aate hain

sarapa gosh ho kar sun ki kya irshad hota hai

dar-e-saqi se aazad-e-do-alam uTh nahin sakta

quyud-e-mazhab-o-millat se rind aazad hota hai

guzishta haal-e-ulfat kya sunoge kya sunaunga

ye qissa kuchh kahin se kuchh kahin se yaad hota hai

payam-e-sad-musibat jaanta hun ek tabassum ko

laraz jata hun jis din KHush dil-e-nashad hota hai

qafas ki titliyon uTho gale mil lo lipaT jao

ki qaid-e-zindagi se ek asir aazad hota hai

kahan pahli si 'qaisar' rasm-e-shagirdi-o-ustadi

jo ek misra bhi kah leta hai ab ustad hota hai