ba-faiz-e-‘ishq ab ye ‘alam-e-dil hota jata hai

ba-faiz-e-‘ishq ab ye ‘ālam-e-dil hotā jaatā hai

jahān-e-ārzū ik harf-e-bātil hotā jaatā hai

asar-andāz shāyad jazba-e-dil hotā jaatā hai

jafāoñ par pashemāñ ḳhud hī qātil hotā jaatā hai

numūd-e-sajda rasm-e-bandagī lāzim nahīñ koī

'aqīdat dil se ho to qurb hāsil hotā jaatā hai

talātum hī talātum hai safīne ke muqaddar meñ

mirī kashtī se har dam duur sāhil hotā jaatā hai

huā jaatā hai rashk-e-anjuman tanhā.ī kā 'ālam

mirī shām-o-sahar meñ kaun shāmil hotā jaatā hai

tadabbur ho agar 'naġhmī' yaqīn-o-‘azm o himmat ho

nishān-e-har-qadam ḳhud naqsh-e-manzil hotā jaatā hai

ba-faiz-e-‘ishq ab ye ‘alam-e-dil hota jata hai

jahan-e-arzu ek harf-e-baatil hota jata hai

asar-andaz shayad jazba-e-dil hota jata hai

jafaon par pasheman KHud hi qatil hota jata hai

numud-e-sajda rasm-e-bandagi lazim nahin koi

'aqidat dil se ho to qurb hasil hota jata hai

talatum hi talatum hai safine ke muqaddar mein

meri kashti se har dam dur sahil hota jata hai

hua jata hai rashk-e-anjuman tanhai ka 'alam

meri sham-o-sahar mein kaun shamil hota jata hai

tadabbur ho agar 'naghmi' yaqin-o-‘azm o himmat ho

nishan-e-har-qadam KHud naqsh-e-manzil hota jata hai