ba-qadr-e-fikr yaktai mili hai

ba-qadr-e-fikr yaktā.ī milī hai

bharī mahfil meñ tanhā.ī milī hai

gul-e-hastī ko ra.anā.ī milī hai

ki rang-o-bū ko yakjā.ī milī hai

diyā raushan karūñ phir tujh ko dekhūñ

baḌī mashrūt bīnā.ī milī hai

adāvat kā yahāñ par zikr hī kyā

mohabbat meñ bhī rusvā.ī milī hai

milī hogī kisī ko shaam raushan

sahar bhī mujh ko sañvlā.ī milī hai

milā hai zauq-e-ḳhud-ārā.ī un ko

mujhe ḳhū-e-jabīñ-sā.ī milī hai

guloñ kā rang bhī utrā hai 'shāriq'

kalī bhī aaj kum.hlā.ī milī hai

ba-qadr-e-fikr yaktai mili hai

bhari mahfil mein tanhai mili hai

gul-e-hasti ko ranai mili hai

ki rang-o-bu ko yakjai mili hai

diya raushan karun phir tujh ko dekhun

baDi mashrut binai mili hai

adawat ka yahan par zikr hi kya

mohabbat mein bhi ruswai mili hai

mili hogi kisi ko sham raushan

sahar bhi mujh ko sanwlai mili hai

mila hai zauq-e-KHud-arai un ko

mujhe KHu-e-jabin-sai mili hai

gulon ka rang bhi utra hai 'shaariq'

kali bhi aaj kumhlai mili hai