ba-sad KHulus ba-tarz-e-nisab paDh Dalen

ba-sad ḳhulūs ba-tarz-e-nisāb paḌh Dāleñ

kitāb-e-ishq kā har ek baab paḌh Dāleñ

añdherā aane pe ye ilm raushnī degā

charāġh bujhne se pahle kitāb paḌh Dāleñ

pas-e-hijāb ruḳh-e-māhnāz paḌh na sake

ho aaj izn agar be-hijāb paḌh Dāleñ

ajab nahīñ ki nayā azm dil meñ paidā ho

hamārī kyā thī kabhī āb-o-tāb paḌh Dāleñ

zamīñ pe bhī isī mīzān ko kareñ qaa.em

falak pe darj ḳhudā kā ḳhitāb paḌh Dāleñ

qayās kījiye kyā kyā savāl ā.eñge

savāl aane se pahle javāb paḌh Dāleñ

shurūa god se ho gor tak rahe jaarī

hisāb rakhiyegā kyā be-hisāb paḌh Dāleñ

mutāle.a ho maqāle kā hai ye haq 'jāved'

mile na vaqt to lubb-e-lubāb paḌh Dāleñ

ba-sad KHulus ba-tarz-e-nisab paDh Dalen

kitab-e-ishq ka har ek bab paDh Dalen

andhera aane pe ye ilm raushni dega

charagh bujhne se pahle kitab paDh Dalen

pas-e-hijab ruKH-e-mahnaz paDh na sake

ho aaj izn agar be-hijab paDh Dalen

ajab nahin ki naya azm dil mein paida ho

hamari kya thi kabhi aab-o-tab paDh Dalen

zamin pe bhi isi mizan ko karen qaem

falak pe darj KHuda ka KHitab paDh Dalen

qayas kijiye kya kya sawal aaenge

sawal aane se pahle jawab paDh Dalen

shurua god se ho gor tak rahe jari

hisab rakhiyega kya be-hisab paDh Dalen

mutalea ho maqale ka hai ye haq 'jawed'

mile na waqt to lubb-e-lubab paDh Dalen