ba-sath-e-ab koi aks-e-na-tawan na paDa

ba-sat.h-e-āb koī aks-e-nā-tavāñ na paḌā

havā guzar bhī ga.ī aur kahīñ nishāñ na paḌā

baḌe sukūn se dekhā hai jalte lamhoñ ko

hamārī aañkh meñ varna dhuāñ kahāñ na paḌā

kaThin bhī aisā na thā merī terī sulh kā kaam

koī bhī shaḳhs mire tere darmiyāñ na paḌā

hue haiñ ḳhaak ḳhamoshī ke dasht meñ kho kar

hamāre kaan meñ hī shor-kārvāñ na paḌā

balā kī dhuup hai 'ja.afar' kisī ko hosh nahīñ

paḌā hai abr kā saayā kahāñ kahāñ na paḌā

ba-sath-e-ab koi aks-e-na-tawan na paDa

hawa guzar bhi gai aur kahin nishan na paDa

baDe sukun se dekha hai jalte lamhon ko

hamari aankh mein warna dhuan kahan na paDa

kaThin bhi aisa na tha meri teri sulh ka kaam

koi bhi shaKHs mere tere darmiyan na paDa

hue hain KHak KHamoshi ke dasht mein kho kar

hamare kan mein hi shor-karwan na paDa

bala ki dhup hai 'jafar' kisi ko hosh nahin

paDa hai abr ka saya kahan kahan na paDa